Додека светот сè уште брои новозаразени од вирусот, а нашата јавност е окупирана околу ветото на Бугарија, во САД се води една од најнеконвенционалните правни битки, во која кампањата на Трамп има основани сомневања и се обидува да докаже дека се случила една од најголемите изборни местенки во САД, но и во историјата на демократскиот и слободен свет. Ние во Македонија за ова речиси ништо не знаеме.

На изборниот ден во САД, Трамп водеше во сите клучни држави: во Пенсилванија дури со над 700.000 гласови, во Џорџија, Висконсин, Мичиген, Аризона, Невада; со над неколку стотини илјади гласови. Наредните денови почнаа “да стигнуваат” гласови од гласањето по пошта, предноста на Трамп волшебно се стопи, и сега тој во сите погорни клучни држави има помалку од 10.000 до 40.000 гласови, во однос на Бајден, или помалку од 0.1% до 0.9% од гласовите.

Луѓе вклучени од цела држава во изборниот процес, почнаа да се пријавуваат како „свиркачи“. Многу од нив почнаа да не се кријат и јавно истапуваат со изјави под заклетва за нерегуларностите на кои биле сведоци. Што пријавуваа свиркачите и што сака кампањата на Трамп да покаже? Еве неколку ситуации:

• Во Пенсилванија и во Мичиген, односно во Филаделфија и Детроит, на набљудувачите од Републиканската партија не им беше дозволено да присуствуваат на пребројувањето на гласовите кои стигнаа по пошта. Избирачките работници лепеа картонски кутии на прозорците од изборните центри. По жалбата во Пенсилванија и одлуката на судот, набљудувачите на Трамп беа пуштени внатре, но држани на 10 па и повеќе метри во ограден простор, од каде што не можеа да видат апсолутно ништо од броењето – со неверојатно објаснување: да не се ширел вирусот и да не се групирале луѓето;
• Низ цела Америка почнаа да стигаат извештаи дека гласале одамна починати. Познатиот починат боксер Џо Фрејзер, меѓу останатите починати, гласал на изборите 2020 (но, ако изгуглате „дали Џо Фрејзер гласал на изборите 2020“, во првите сугерирани линкови, или „извори од доверба“, trusted sources, Гугл ќе ви каже дека вакво нешто не е возможно);
• „Фрлање на гласови“ (vote dumps), во Пенсилванија, Мичиген и Висконсин, во раните утра, каде во рок од 60 до 90 минути, на неколку наврати во компјутерското сметање се „фрлени“ 120.000, 150.000 и 160.000 гласови – физички е невозможно да се избројат 120.000 гласови за 90 минути;
• Возачи на „Американски пошти“ јавно излегоа и изјавија на сослушувањето на сенатот во Мичиген дека денови после денот на изборите, носеле цели камиони со гласачки ливчиња од Њу Јорк во Мичиген и Пенсилванија (федерално злосторство е да пренесувате гласачки ливчиња од гласање по пошта меѓу две сојузни држави);
• Во Детроит има повеќе гласачки ливчиња отколку регистрирани гласачи – дури звучи како да станува збор за избори од некоја земја од третиот свет;
• Стотици гласачи, главно од Републикански средини, на кои не им било дозволено да гласаат на изборниот ден, затоа што им рекле дека веќе гласале по пошта – може лесно да се провери дека тие не побарале од изборните комисии гласачки ливчиња за гласање по пошта. 
• Гласачките машини „Доминион“, распоредени во главно Демократски управуваните држави, за кои се увиде во неколку општини дека имале „софтверска грешка“ (glitch), каде гласовите дадени за Трамп машината ги префрлала за Бајден. „Доминион“ имала седиште во Канада, а самата Канада не ги користи. Произлезе дека дел од сопствеништвото на „Доминион“ може да се пронајде до сопругот на лутата противничка на Републиканците, Ненси Пелоси, а најдоа дека фирмата за гласање дала донација за Демократски кандидат…;
• На повторното пребројување на гласовите во Џорџија, одеднаш почнаа да излегуваат непребројани гласови, на едно место излегоа 2500, на друго 2700, на трето 300, сите главно од Републикански области и кои беа 70:30 за Трамп – основа за судски процес;
• И покрај тоа што гувернерот на Џорџија е Републиканец, тој до денеска не дозволува проверка на потписите од ковертите од гласањето по пошта;
• Најголемиот скандал, според кампањата на Трамп, е видео снимка од пребројувањето на гласовите во Џорџија во 22:30 часот во општината Фултон (градот Аталанта, упориште на Демократите). На снимката се гледа како салата каде ги бројат гласовите, одеднаш почнува да се празни. Токму тоа е часот кога се објави дека во изборните простории пукнала цевка за вода и дека се случила поплава. Откако сите ќе си заминат, во салата остануваат четворица пребројувачи и видно конспиративно, вадат неколку црни торби полни со гласачи ливчиња од под една маса, и ги ставаат на куп со другите. Надлежните се правдаа дека тоа е вообичаено во пребројување на гласовите. Кампањата на Трамп ги пројанде вработените, кои произлезе дека се симпатизери и донатори на Демократите.

Но, што се случи? Медиумите се случија.

Во неконвенционалната војна со најнеконвенционалниот претседател на САД, медиумите решија да го жртвуваат својот кредибилитет: изборниот процес сѐ уште незавршен, тие го прогласија Бајден за избран претсеседател (president elect). Ниту изборните резултати се сертифицирани, ниту електорите од државите се собрале да го изберат претседателот, а кампањата на Трамп која го има секое демократско право – право кое деновиве интензивно го користи – да ги оспори резултатите и да се обиде да докаже дека има измама, има тотален блекаут од нив.

Која иронија. Наместо денеска да слушаме дебата дали денеска се случила или не најголемата изборна измама во историјата на САД, па и на светот, на јавноста и се форсира дека Бајден е избран-претседател. Неколку „главни“ медиуми во САД, кога Трамп, во својство на претседател на САД, ја искажа својата загриженост за можна измама – му го прекинаа преносот, изјавувајќи дека тоа биле глупости. Како едноставно да треба да им поверувате дека тоа е вистината, само затоа што тие така велат, и измама е нешто што е невозможно да се случи.

Ако следите Американска политика, ќе знаете дека истите медиуми цело време го третираа Трамп со најлош можен однос. На големо известуваа за “руската соработка” на кампањата на Трамп во 2016 и дека Русите му помогнале да стане претседател (можеби повеќе вистинито од “Руска помош” ќе беше ако кажуваа за дечките од Велес со наменските веб-сајтови дека му помогнаа многу повеќе од Русите, ама Велес не е актуелен, затоа што дечките веројатно тоа го правеле за гола заработка, во борба за кликови и некој долар повеќе – и во сето тоа немаше ништо криминално, освен што ги искористиле можностите кои самиот Гугл ги давал – нешто кое Гугл, срж на поддршката за Демократите, настоен крајно анти-Трамп, не сакаше јавно да го признае). Хистеријата која истите медиуми ја направија, доведе до неуспешен импичмент. “Russian colusion” или “Руската соработка” е наративот на Демократите до ден денес, дека Трамп е нелегален претседател. Во време на кампањата во Октомври, новинарите од „главните“ медиуми го „пржеа“ Трамп со изјави дека тој е виновен за 200.000 мртви од вирусот, а Бајден го прашуваа каков сладолед јаде – „од чоколадо и ванила“, одговори тој – никој од нивните новинари не се осмелуваше ни да го праша за компјутерот на син му Хантер и дали тој навистина му помогнал додека бил на функција околу бизнисот на син му во Украина.

Во едно слободно општество како Американското, тоа е многу: довербата тешко се стекнува, брзо се губи, речиси ретко се повраќа назад. Луѓето, желни да слушнат што навистина се случува, масовно почнаа да се претплаќаат на „Њузмакс“ или на „ОАН“ телевизиите, или да го следат порталот „Брајтбарт“ и весникот „Њу Јорк Пост“ – сите имаат рапидно зголемување на гледаноста.

Згора на сè е разочарувачкиот однос на Фејсбук и на Твитер, кои сè повеќе делуваат како медиуми, а не како платформи на кои може да се искаже слободниот говор. Веднаш после изборите, секој Твит на Трамп околу изборите му беше блокиран, не можеше да се сподели, ниту да му се стави лајк. Неверојатна цензура спрема еден американски претседател. По итното сослушување во Сенатот на водачите на Твитер и на Фејсбук, Дорси и Закерберг, престанаа да му ги блокираат, но, под секој пост и твит за изборната измама кај него, како и на водачите на Републиканците, има ознаки: „Ова тврдење за изборна измама е оспорено“, „Друга е проекцијата на победникот на изборите“, „Дознајте како изборите во САД се безбедни“… Ако кликнете на ознаката, ве води не до изборната комисија на САД (каде процесот, секако, се уште трае), туку до линкови од медиумите, како Си Ен Ен, Асошиејтед Прес, Ен би си, Њу Јорк Тајмс, Вашинготн Пост… Настрана што многу профили, кои јавно Твитаа за изборните измами – Твитер почна да ги брише и да ги блокира. Многу Американци, незадоволни од односот, и тука прагматично почнаа да го решаваат проблемот – се придвижуваат на новата социјална мрежа „Парлер“ која веќе има над 7 милиони корисници, а непречено споделуваат видеа на „Рамбл“ – Гугл и ЈуТјуб немаат тука збор.

Морам да споменам една иронична ситуација.

Низ Твитер почна да кружи едно вирално видео, во кое некоја жена снима двајца луѓе покрај контејнер за ѓубре, кои ѝ се легитимираа како “election officials” – членови на изборна комисија. Тие од ѓубрето собираа гласачки ливчиња и коверти од поштенското гласање, и ги пакуваа во црни торби, за кои рекоа дека ќе ги носеле во изборниот центар. Комичната ситуација, под видеото стои насока како да размислувате:

“Дознај како гласањето по пошта е безбедно и сигурно”

Тука ме фати смеа. Да било безбедно и сигурно, гласачките ливчиња немало да завршат во контејнер за ѓубре, за кого и да биле.

На, 2 декември, претседателот на САД се јави со обраќање од Белата Куќа со видео насловено: „Можеби најважниот говор кој некогаш сум го остварил“ – во кој отворено се изјасни дека ќе оди до крај околу расчистувањето на изборната измама. „Без разлика на крајот кој ќе биде победник, заради иднината на САД и иднината на демократијата, должни сме да го истуркаме овој процес, не само спрема 74-те милиони американци кои гласаа за мене, туку и за сите оние кои не гласаа за мене, а чиј претседател сум јас. Да покажеме дека изборна измама се случи – ќе биде мојот најголем допринес за Американската држава и демократија, за да нема сомнеж во било чија легитимност како претседател – нешто низ кое ниту еден кандидат за претседател во иднина не смее да поминува!“

Трамп нема да се откаже до крај.

А ние ќе продолжиме да ја следиме ситуацијата. Деновиве ќе продолжиме со статии во кои на македонската јавност ќе го објасниме правниот процес кој моментално се случува, што сака изборниот штаб на Трамп да направи, како и зошто следните избори за двете сенаторски места во Џорџија се толку многу важни за иднината на САД.

Пишува: Зоран Данилов, оперски пејач, голем фан на конзервативните политики како и на американскиот претседател Доналд Трамп.